ماهية البرمجة كلام مختصر

 

البرمجة؟! يعني شنو؟.🤨 ، بتتخلع لمن تشوف الحاجات دي

 😵

كتير مننا ما فاهم البرمجة دي شنو او بعملو ليها شنو او بقروها كيف اصلا والبعض مفتكر انها رموز رياضيات وفيزياء فلكية وطلاسم🤔🙄

في الواقع البرمجة غير كده،

بدايةََ البرمجة هي احد اهم أركان وعمود وشئ رئيسي كل 💻🖥️التخصصات المتعلقة بالحاسوب

البرمجة حاجة جميلة ذات مذاق خاص لمن يتذوقه😋، عالم جميل لمن يفهمه🤩، مليئ بالابداع والجمال والتفكير المنطقي😍

البرمجة بشكل عام : - 

فالبرمجة هي مجموعة أوامر وتعليمات بيديها الشخص المختص بالمجال للكمبيوتر لتنفيذ مهمة معينه، الأوامر والتعليمات دي ما  بتكتب ساي بل بتكون خاضعة لمفاهيم وقواعد نظرية وضعت من قبل مهندسين حاسوب و مبرمجين كبار

بمجرد فهمك للقواعد والمافاهيم دي بتصبح قادر علي كتابة اي أمر حسب اللغة الانت حبيتها.

ياااخ كرهتنا طيب البرمجة دي بيعملوها بيها شنو انا ما فاهم 🤨

بسيط عاين حوليك، ولا ليه ماشين بعيد عاين في تلفونك الفي يدك ده الفيس بوك الانت الان بتقرا منه البوست ده عبارة عن موبايل ابليكيشن متكوب بلغة برمجة 

شايف كيف؟ 

 تلفونك بالكامل لولا الله ثم البرمجة  لكان قطعة حديدة ما منها  فايدة فنظام التشغيل  الانت شغال  بيهو غالباً أندرويد فهو مكتوب بلغة الجافا وهي لغة برمجة 

جميع التطبيقات والالعاب والبرامج وكل حاجة رقمية مكتوبة بلغة برمجة، انستقرام فيسبوك واتساب يوتيوب جوجل كل حاجة مكتوبة بلغة برمجة 

الالعاب البتلعبها في التلفون او البلايستيشن او الكمبيوتر او اللابتوب بتاعك معمولة كلها بالبرمجة 

التطبيقات البتستخدمها جميعها كل حاجة. 

فالبرمجة تخصصات وفروع فالبعض منها مثلا والاشهر :

برمجة تطبيقات الهواتف الذكية للاندرويد والاي او اس

برمجة تطبيقات سطح المكتب 

برمجة الالعاب

برمجة أنظمة ومواقع الإنترنت. 

فلكل منها الادوات الخاصة والفروع منها وانت كشخص محب للمجال بتشوف انت وين بتفضل اكتر. 

تذكر دايماََ بأن مافي شي صعب في الحياة دي وطالما عندك هدفك و عندك الإرادة الشغف والطاقة انت حتقدر وحتنجز بكل تأكيد ودايماََ تذكر بأن الله لا يضيع أجر من أحسن عملاََ.